اسلام آباد۔21فروری(اے پی پی) سپریم کورٹ ملک دے 8 فروری دے عام انتخابات کوں کالعدم قرارݙیوݨ متعلق درخواست خارج کرݙتی۔عدالت درخواست گزار بریگیڈیر( ریٹائرڈ )علی خان دی عدالت اچ عدم پیشی دی بنا تے انہاں تے 5 لکھ روپے جرمانہ لاݙتے۔تفصیلات موجب چیف جسٹس قاضی فائز عیسی دی سربراہی اچ سپریم کورٹ دے ترائے رکنی بینچ عام انتخابات کوں کالعدم قرار ݙیوݨ دی درخواست تے سماعت کیتی۔درخواست گزار علی خان گزریل سماعت تے عدالت اچ پیش نی تھئے ۔عدالت کاوڑ کریندے ہوئیں متعلقہ تھاݨے دے ایس ایچ او کوں حکم ݙتا ہئی جو او درخواست گزار کوں عدالت اچ پیش کرن ۔ ایں توں انڄ رجسٹرار آفس توں وی آکھیا ڳیا ہئی جو او درخواست گزار نال رابطہ کرے۔درخواست گزار سابق بریگیڈیئر علی خان ٻدھ کوں وی عدالت اچ پیش نہ تھئے ۔ایڈیشنل اٹارنی جنرل عدالت کوں ݙسایا جو علی خان دے گھر پولیس وی ڳئی اتے وزارت دفاع دے ذریعے نوٹس وی بھیجا ڳئے جݙاں جو او گھر کائناں ہن ۔ ایڈیشنل اٹارنی جنرل ݙسایا جو درخواست گزار سابق بریگیڈیئر ہن جنھاں دا 2012 اچ کورٹ مارشل تھیا ہئی ۔ چیف جسٹس درخواست گزار دی ای میل عدالت اچ پڑھ تے سݨائی جیں اچ انہاں درخواست واپس گھنݨ دی استدعا کیتی اے ۔علی خان لکھیے جو ٻاہرلے ملک ہووݨ دی وجہ توں عدالت اچ پیش نی تھی سڳدا ۔ سپریم کورٹ درخواست کوں خارج قرار ݙیندے ہوئیں درخواست گزار بریگیڈیر ( ریٹائرڈ ) علی خان دی عدالت اچ عدم پیشی دی بنا تے 5 لکھ روپے جرمانہ لاݙتے۔
.jpg)
