حکومت این آر او سانگے کہیں توں وی بلیک میل نہ تھیسی،پسماندہ علاقیاں کوں شہری علاقیاں دے سانویں ترقی ڈیونڑ ترجیح اے، وزیراعظم عمران خان دا اجلاس نال خطاب
اسلام آباد ۔ 25 اگست(اے پی پی)وزیراعظم عمران خان دے زیر صدارت وفاقی کابینہ دے اجلاس اچ ملک اچ کنڑک ، اٹے اتے کھنڈ دا ملھ مناسب رکھنڑ سانگے اقدامات،،عوام کوں ودھ توں سوکھ دڈیونڑ دی حکمت عملی،تے غور سودھا کراچی اتے سندھ دے عوام دے اوکھ تے چنتا کیتا گئے۔ کابینہ سابق وزیراعظم نوازشریف دی وطن واپسی سانگے حکمت عملی تے وی الوائے۔وزیراعظم عمران خان آکھیے جو حکومت این آر او سانگے کہیں توں وی بلیک میل نہ تھیسی،پسماندہ علاقیاں کوں شہری علاقیاں دے سانویں ترقی ڈیونڑ ترجیح اے۔کابینہ دے اجلاس اچ وفاقی وزیر حماد اظہر ملک اچ کنڑک اتے کھنڈ دی دستیابی، مناسب ملھ رکھنڑ سانگے اقدامات تے پیش رفت بارے جائزہ پیش کیتا۔وزیراعظم آکھیا جو پسماندہ علاقیاں دے لوکاں کوں شہراں آلی کار ترقی اتے جیونڑ سوکھا کرنڑ سانگے اقدامات حکومت دی ودھ توجہ تے ہین،کراچی سودھا سندھ دے عوام دے اوکھ تے بہوں چنتا اے، لوکاں کون ریلیف سانگے فوریا قدامات کیتے ونجن۔ اجلاس اچ سابق وزیراعظم نوازشریف دی ضمانت اتے بیرون ملک روانگی سانگے ولا وطن واپسی دے اقدامات تے وی بریفنگ ڈتی گئی۔ اجلاس کوں ڈسایا گئے جونوازشریف کوں رعایت انسانی بنیاداں تے ڈتی گئی اے بھل انہاں حسب روایت ایندا ناجائز فیدہ چاتے، نوازشریف کوں ضمانت کیتے شہباز شریف گارنٹی ڈتی ہئی۔وزیراعظم عمران خان آکھیے جو پچھلے این آٓر او ملک کوں قرض دی دلدل اچ سٹیے،حکومت ملکی مفاد سانگے ہر اقدام کریسی اتے این آر او سانگے کہیں توں وی بلیک میل نہ تھیسی،قانون ہر کہیں کیتے ہکو سواں اے،احتساب اتے کرپشن تے کوئی وی وتھی نہ ڈتی ویسی۔
