اسلام آباد۔23جنوری (اے پی پی) صدر مملکت ڈاکٹر عارف علوی سویڈن اچ قرآن پاک دی بے حرمتی دی مذمت اتے اسلامو فوبیادے خلاف اجتماعی عزم دا مطالبہ کریندیں ہوئیں آکھیا جو آزادی اظہار رائے دی آڑ اچ اسلام دی مقدس کتاب دی توہین نال ارباں مسلماناں دے جذبات کوں ٹھیس پڄی اے۔ سنوار کوں ایوان صدر دے پریس ونگ توں جاری بیان موجب صدرمملکت آکھیا جو قرآن دی توہین دا عمل احمقانہ، اشتعال انگیز اتے اسلامو فوبک اے، اےغیر اخلاقی واقعہ بلاوجہ اشتعال انگیزی اتے دنیا دے مسلماناں دے جذبات کوں مجروح کرݨ دا عمل اے۔ انہاں آکھیا جو اے قابل مذمت عمل بین الاقوامی سطح تے منیے اصولاں اتے آزادی اظہار رائے دے جائز اظہار دے اصولاں دے منافی اے۔ صدرمملکت آکھیا جو آزادی اظہار رائے نفرت انگیز تقریراں اتے لوکاں کوں تشدد تے اکساوݨ دی موکل نی ݙیندے۔ اسلام دنیا دے سارے مذہب کیتے عزت تےاحترام دی تلقین ݙیندے۔ انہاں آکھیا جو نفرت دے نظریے کوں ودھاوݨ آلے اتے انتہا پسند اتے بنیاد پرست عانصر کوں نفرت کھنݙاوݨ دی موکل نی ݙیوݨی چاہیدی۔
