اسلام آباد۔13جون (اے پی پی):وفاقی وزیر خزانہ و محصولات سینیٹر محمد اورنگزیب آکھیے جو وفاقی بجٹ اچ ٹیکس بنیاد ودھاوݨ، معیشت دی دستاویز بندی اتے ݙیجیٹلائزیشن، ھیݨے طبقیاں کوں تحفظ ݙیوݨ تے زور ݙتا ڳئے، جنرل سیلز ٹیکس 18 توں ودھا تے 19 فیصد کرݨ دی کوئی تجویز کائنی، پٹرولیم ڈویلپمنٹ لیوی دا اطلاق مرحلہ وار کیتا ویسی، جی ڈی پی اتے افراط زر دے اہداف حقیقی ہین، 12 ہزار ارب دی لیکیجز بند کرݨ تے کم تھیندا پئے، نجکاری تے اتحادی جماعتاں نال مشاورت کیتی ویسی، نان فائلرز دکی اختراع مکاوݨی ہوسی۔ اے ڳالھ انہاں اسلام آباد اچ وزیر مملکت علی پرویز ملک، سیکرٹری خزانہ امداد اللہ بوسال اتے چیئرمین ایف بی آر امجد زبیر ٹوانہ نال پوسٹ بجٹ پریس کانفرنس اچ آکھی۔ وزیر خزانہ آکھیا جو ملک اچ جی ڈی پی دے تناسب نال ٹیکساں دی شرح 10 فیصد تئیں اے، آندے 2 توں 3 سال اچ جی ڈی پی دے تناسب نال ٹیکساں دی شرح 13 فیصد تئیں ڳھن ویسوں، غیردستاویزی معیشت ماکوݨ ترجیح اے تاں جو ڈیجیٹلائزیشن ودھے، ایندے کیتے ٹیکس نظام اچ انسانی مداخلت ڳھٹائی ویسی جو ریونیو ودھے اتے شفافیت وی آوے۔ وزیر خزانہ آکھیا جو ودھ آمدن آلیان تے ودھ اتے ڳھٹ آلیاں تے ڳھٹ توں ڳھٹ تیکس رکھیا ڳئے، نان فائیلرز دی گنجائش کائنی تہوں ٹیکس دی شرح ودھائی اے۔ وزیر خزانہ آکھیے جو وزیر خزانہ آکھیے جو تنخواہیں دی مد اچ مجموعی طور تے ودھارا کیتا ڳئے ٻھل ایندا انفرادی طور تے ٻھار زیادہ کائنی، ریٹیلرز کوں ٹیکس نیٹ اچ ڳھن آوݨے، یکم جولائی توں ریٹیلرز تے وی ٹیکس دا نفاذ تھی ویسی، ڈیجیٹلائزیشن نال زیر گردش 9 ٹریلین روپے دی کرنسی سسٹم اچ ڳھن آوݨ ضروری اے، کیش ٹرانزیکشن مکاوݨ، پوائنٹ آف سیل رجسٹریشن ولا شروع کیتی ویسی۔ وزیر خزانہ آکھیے جو فری لانسرز بارے پاکستان دنیا دا تریڄھا وݙا ملک اے، آندے مالی سال دے بجٹ اچ آئی ٹی دے فروغ کیتے کرنٹ اتے ڈویلپمنٹ ݙوہاں محاذاں تے نمایاں فنڈز مختص کیتے ڳن، ڈیجیٹل انفراسٹرکچر بہتر ٻݨایا ویسی، آئی ٹی برآمدات 3.5 ارب ڈالر توں 8 ارب ڈالر تئیں ودھایا ونڄ سڳدے، چھوٹے کاروبار کیتے بنکاں کوں کردار ادا کرݨ دی لوڑھ اے، بنکاں نال زراعت، آئی ٹی اتے ایس ایم ایز کیتے فنانسنگ تے ڳالھ تھئی اے انہان شعبیاں اچ بجٹ سبسڈیز دے تحت پیسے رکھیے ڳن جو ایس ایم ایز کوں فیدہ پڄے۔ سرکاری شعبہ دے سالانہ ترقیاتی پروگرام اچ جاری منصوبیاں تے توجہ ݙتی گئی اے اتے 81 فیصد فنڈز انہاں منصوبیاں کیتے مختص ہین جیڑھے مکمل تھیوݨ آلے ہن، نویں منصوبیاں کیتے فنڈز مختص کرݨ دی شرح 19 فیصد اے۔ وزیر خزانہ آکھیے جو مجموعی وصولیاں بارے صوبیاں نال صلاح کریندے پئے ہن، اٹھارہویں ترمیم دے تحت صوبیاں کوں منتقل تھیوݨ آلیاں وزارتاں اتے محکمے بند کرݨے چاہیدن، غیرضروری اخراجات تے قابو پاتا ویسی، ڄیکر صوبے مرکز دا ٻھار ونݙیسن تاں مالی گنجائش نکلسی، پالیسی ریٹ اچ کمی پاروں آندے سال افراط زر دی شرح 12 فیصد تئیں رکھی ڳئی اے، اسلام آباد ایئرپورٹ دی آؤٹ سورسنگ اگست تئیں تھی ویسی، بجلی اتے توانائی دے شعبے اچ اقدامات جاری ہین، ٹیکس قوانین اچ تبدیلیاں تھینداں پن، پالیسی ریٹ اچ بہتری آئی اے، تیھکے صنعتاں کیتے چنڳیاں خبراں آسن۔
