اسلام آباد۔25مئی (اے پی پی):وفاقی وزیر اطلاعات، نشریات، قومی ورثہ و ثقافت عطاءاللہ تارڑ آکھیے جو خصوصی سرمایہ کاری سہولت کونسل (ایس آئی ایف سی) دے اجلاس نال اتحاد دا پیغام ڳئے جو ملکی ترقی سانڳے وفاق اتے اکائیاں ھک پیج تے ہن ، معاشی اشاریئے مثبت ہن، ٻاہرلے ملکاں توں پاکستان اچ سرمایہ کاری سانڳے رقم مختص کیتی ویندی پئی اے ، مہانگ 38 فیصد توں گھٹ تے 17 فیصد تے آڳئی اےآندے مہینے مزید گھٹ تھیسی ۔ ایس آئی ایف سی اجلاس اچ وزیراعلیٰ خیبر پختونخوا نال خوشگوار ماحول اچ ڳالھ مہاڑ تھئی ۔اے ڳالھ انہاں خصوصی سرمایہ کاری سہولت کونسل (ایس آئی ایف سی) دے اجلاس دے بعد میڈیا نال گفتگو اچ آکھی اے ۔ وفاقی وزیر اطلاعات آکھیے ایس آئی ایف سی دا اجلاس چنڳے تے خوشگوار ماحول اچ تھئے ، اجلاس اچ ملکی معیشت، سرمایہ کاری ودھاوݨ پبلک پرائیویٹ پارٹنر شپ دے حوالے نال تفصیلی ڳالھ مہاڑ تھئی ۔ وفاقی وزیر آکھیے وفاق اتے صوبیں اچ ایس آئی ایف سی دے فورم دے ذریعے سرمایہ کاری کوں ودھارا ݙتا ویسی ۔ انہاں آکھیے سارے صوبائی وزراء اجلاس اچ آپݨی قیمتی صلاح ݙتی اے ، انھاں دے تعاون نال ہی اے فورم اڳوں ودھسی ۔ انہاں آکھیے متحدہ عرب امارات دی طرفوں 10 ارب ڈالر دی سرمایہ کاری مختص کرݨ تے اجلاس اچ ڳالھ مہاڑ تھئی اے ۔ وفاقی وزیر آکھیے وزیراعظم شہباز شریف سرمایہ کاری اتے تجارت ودھاوݨ سانڳے ایس آئی ایف سی دے اندر چین، متحدہ عرب امارات، سعودی عرب، قطر، یورپی یونین اتے امریکہ سانڳے چھی ڈیسک بݨاوݨ دی ہدایت کیتی جیں دی سارے وزراءاعلیٰ تعریف کیتی اے ۔
