تل ابيب -09 آڪٽوبر (اي پي پي) اسرائيل جي دفاع واري وزير يوايو گيلانٽ چيو آهي، ته جنگ جا اصول بدلجي ويا آهن، حماس اسرائيل تي حملي کان پوءِ 50 سالن تائين پڇتائيندو. اسرائيل جي اخبار ٽائمز آف اسرائيل مطابق دفاع واري وزير ڏکڻ اسرائيل جي اوفاڪيم علائقي جو دورو ڪيو جنن تي فسلطينين حملو ڪيو هو. اسرائيل جي دفاع واري وزير ان موقعي تي چيو ته جنگ جا اصول بدلجي ويا آهن ۽ حماس اسان جي جواب کي 50 سالن تائين وساري نه سگهندو. هن چيو ته غزه جي پٽي ۾ اسرائيل جي جوابي ڪارروائي ايندڙ 50 سالن تائين ماڻهن جي ذهنن ۾ تازي رهندي ۽ حماس کي اها ويڙهه ڪرڻ تي پڇتاءُ ٿيندو. هن چيو ته جنگ جا اصول بدلجي چڪا آهن، غزه جي پٽي جيڪا قيمت ادا ڪندي اها وڌيڪ هوندي. اسرائيل تصديق ڪئي ته غزه ۾ گهٽ ۾ گهٽ 100 اسرائيلن کي حراست ۾ ورتو ويو آهي جڏهن ته ڪجهه ميڊيا رپورٽن مطابق غزه پٽي ۾ 170 اسرائيلن کي يرغمال بڻاوي ويو آهي. واضح رهي ته ڇنڇر ڏينهن شروع ٿيل جنگ جي ٻن ڏينهن کان پوءِ 700 کان وڌيڪ اسرائيلي فوت ۽ 2200 کان وڌيڪ زخمي ٿي چڪا آهن. اسرائيل جوابي ڪارروائي ڪندي غزه پٽي خلاف وڏي پئماني تي فوجي آپريشن ڪيو آهي، جنهن جي نتيجي ۾ هن وقت تائين 370 فلسطيني شهيد ۽ 2 هزار جي لڳ ڀڳ زخمي ٿي چڪا آهن.
