اسلام آباد۔29دسمبر(اے پی پی) وزیرمملکت خزانہ ومحصولات ڈاکٹرعائشہ غوث پاشا آکھیے ملک دے بہتریں مفاد اچ غیر ضروری تے پرتعیش چیزاں دی درآمد تے پابندی لاتی ڳئی ، اے پابندیاں عارضی ہن تے معیشت وکرنسی دی صورتحال بہتر تھیوݨ تے ایندے اچ نرمی کیتی ویسی ۔ اے ڳالھ انہاں خمیس کوں اتھاں سینیٹ دی قائمہ کمیٹی خزانہ ومحصولات دے اجلاس اچ آکھی اے ۔ قائمہ کمیٹی دا اجلاس سینیٹر سلیم مانڈوی والا دی صدارت اچ پارلیمنٹ ہاؤس اچ منعقد تھیا۔اجلاس دے آغازاچ سابق فاٹا دے صنعتی اداریں دے حوالے نال فیڈرل ایکسائز ڈیوٹی/سیلز ٹیکس دے بقایا جات دے استثنا دے معاملے تے تفصیلی ڳالھ مہاڑ تھئی، اجلاس اچ مالاکنڈ چیمبر آف کامرس اینڈ انڈسٹری دے عہدیداراں کمیٹی توں درخواست کیتی جو سابق فاٹا اتے پاٹا اچ واقع اسٹیل اتے گھیو وکوکنگ آئل دی 86 صنعتاں کوں روبہ ماضی فیڈرل ایکسائز ڈیوٹی توں چھوٹ، ایف بی آر کوں ان پٹ ٹیکس کریڈٹ دی واپسی دی اجازت ݙیوݨ یا ٹیرف ایریاز اچ سپلائی دے بدلے ایندی ایڈجسٹمنٹ، سابق فاٹا اچ تیل،گھیو تے اسٹیل دی صنعتاں کوں بجلی دے ٻلاں اچ ٹیکس توں استثنا، سابق فاٹا اتے پاٹا کوں ایف بی آر دے زیر انتظام لیویز اچ چھوٹ دی مدت اچ مزید پنج سال دی توسیع کیتے وفاقی حکومت کوں فیڈرل ایکسائز ایکٹ 2005 اچ ترامیم دی تجویز پیش کرن۔ چیئرمین کمیٹی مناسب غور و خوض دے بعد مالاکنڈ چیمبر آف کامرس اینڈ انڈسٹری دے عہدیداراں کوں ہدایت کیتی جو او ٹیکس استثنادا مناسب جواز ݙیون تے ایں معاملے تے حکومت نال مزید ڳالھ مہاڑ کرن۔ اجلاس اچ لیٹرآف کریڈٹ کھولݨ دے حوالے نال پابندیاں تے اسلام آباد اچ مووان پک دے ناں توں فائیوسٹارہوٹل دے امورتے وی تفصیلی بحث تھئی ۔ وزیر مملکت خزانہ و محصولات ڈاکٹرعائشہ غوث پاشا آکھیے زبردست معاشی دباؤدی وجہ توں کجھ پابندیاں لاوݨیاں پئن ، ملک دے بہترین مفاد اچ غیر ضروری اتے پرتعیش چیزاں دی درآمد تے پابندی لاتی ڳئی، اے پابندیاں عارضی نوعیت دی اے اتے معیشت وکرنسی دی صورتحال بہتر تھیوݨ تے نرمی کیتی ویسی ۔ کمیٹی دے ارکان آکھیے ایں حوالے نال 90 فیصد کم پہلے ہی مکمل تھی چکیے ، ارکان اسٹیٹ بینک اتےوزارت خزانہ دے حکام کوں مشورہ ݙتا جو او درآمد دی مخصوص درخواستاں تے غور کرن تے ایں سلسلے اچ تاجراں کوں پیش آندے مسئلے مکاوݨ کیتے کم کرن ۔اجلاس اچ سینیٹرز فاروق حامد نائیک، سعدیہ عباسی، انوار الحق کاکڑ، مشتاق احمد، وزیر سیفران سینیٹر محمد طلحہ محمود، وزیر مملکت خزانہ و محصولات ڈاکٹر عائشہ غوث پاشا، وزارت خزانہ اتے اسٹیٹ بینک دے سینئر حکام شرکت کیتی۔
