اسلام آباد۔12اگست (اے پی پی) پاکستان اتے ترکیہ ݙو پاسہ تجارت ودھاوݨ کیتے ترجیحی تجارت دے معاہدے تے دستخط کر ݙتن۔ معاہدے تے دستخط دی تقریب جمعے کوں وزیراعظم آفس اچ تھئی جئیں اچ وزیراعظم شہباز شریف، وفاقی وزیر تجارت سیّد نوید قمر، وفاقی وزیر اطلاعات و نشریات مریم اورنگزیب، وفاقی وزیر موسمیاتی تبدیلی شیری رحمان اتے وفاقی وزیر سرمایہ بورڈ چوہدری سالک حسین، ترکیہ دے وزیر تجارت مہمت موس اتے اعلیٰ سرکاری افسران شریک تھیے۔ وفاقی وزیر تجارت سیّد نوید قمر اتے ترکیہ دے وزیر تجارت مہمت موس معاہدے تے دستخط کیتے۔ معاہدہ دے تحت ترکیہ زرعی اتے صنعتی شعبیاں دی پاکستان دی مختلف مصنوعات دی برآمد تے 261 ٹیرف لائنز جݙانجو پاکستان 130 ٹیرف لائنز دی رعایت ݙتی اے۔ ڈو پاسہ تجارتی تعلقات دے ودھارے کیتے 2016 اچ پاکستان اتے ترکیہ وچال فریم ورک معاہدے تے دستخط کیتے ڳئے ہن۔ فریم ورک معاہدہ دے تحت مختلف ایجھے شعبیاں دی نشاندہی کیتی سانجھی اسٹڈی شروع کیتی جئیں اچ تجارت دے رستے اچ حائل ٹیرف دی رکاوٹاں کوں دور کر تے ݙوہیں ملک پیشرفت کر سڳدے ہن۔ مئی اچ وزیراعظم شہباز شریف دے ترکیہ دے دورہ توں پہلے تئیں ترجیحی تجارت دے معاہدے تے مذاکرات دا عمل سست رہیا۔ ترجیجی تجارت دے معاہدہ دے تحت پاکستان 216 ٹیرف لائنز اچ مارکیٹ تئیں رسائی حاصل کیتی اتے انہاں مصنوعات دی پاکستان دی عالمی برآمدات دا حجم 5.1 ارب ڈالر جݙانجو ترکی دی انہاں مصنوعات دی عالمی درآمدات 7.6 ارب ڈالر ہن۔ پاکستان جیڑھی 130 ٹیرف لائنز تے رعایت ݙتی اے انہاں اچ ترکیہ دی عالمی برآمدات 23 ارب ڈالر ہن جیڑھی ترکیہ دی عالمی برآمدات دا 12 فیصد ٻݨدن جݙانجو پاکستان دی انہاں مصنوعات دی عالمی درآمدات 6 ارب ڈالر ہن۔ 2021-22 اچ پاکستان اتے ترکیہ دا ݙو پاسہ تجارتی حجم 883 ملین رہیا جئیں اچ پاکستان دی ترکیہ کیتے برآمدات دا حجم 366 ملین ڈالر جݙانجو ترکیہ توں پاکستان دی درآمدات 517 ملین ڈالر ہئی اتے 2021-22 اچ تجارتی توازن ترکیہ دے حق اچ 151 ملین ڈالر ریکارڈ کیتا ڳئے۔
