اسلام آباد۔7ستمبر (اے پی پی) پاک فضائیہ پورے ملک اچ آپݨے سارے ائیر بیسز اتے تنصیبات تے 7 ستمبر یوم شہدا دے طور تے منایا ۔ ݙینھ دی شروعات 1965 اتے 1971 دیاں جنگاں دے شہدا اتے انہاں سارے لوکاں کیتے خصوصی دعاواں تے قرآن خوانی توں کیتا ڳئے جنہاں پاکستان دے معرض وجود اچ آوݨ توں گھن تے ہݨ تئیں مادرِ وطن کیتے آپݨیاں جاناں قربان کیتیاں ، ایں سلسلے اچ مرکزی تقریب ائیر ہیڈ کوارٹرز اسلام آباد اچ منعقدکیتی ڳئی۔ سربراہ پاک فضائیہ ائیر چیف مارشل ظہیر احمد بابر سدھو تقریب دے مہمانِ خصوصی ہن۔ 7 ستمبر دے یادگار اتے تاریخی ݙینھ دے موقع تے خطاب کریندے ہوئیں ائیر چیف پاک فضائیہ دے انہاں سارے ہیروز کوں خراجِ تحسین پیش کیتے جنہاں ہمیشہ بے مثال بہادری دے نال قوم دی آواز تے لبیک آکھیے تے عظیم مقصد کیتے ݙوجھیں توں اڳوں ودھ تے آپݨی جاناں دا نذرانہ پیش کیتے۔ ایئر چیف آکھیے جو پاک فضائیہ خطے دی بدلدی ہوئی صورت حال توں باخبر اے اتے پاکستان دی سالمیت اتے وقار دے دفاع کیتے مکمل تیار اے۔ ایں خاص ݙینھ دے موقع تے انہاں سارے کشمیریاں نا وی یکجہتی دا اظہار کیتے جنہاں آزادی دی خاطر لڑدے ہوئے آپݨی جاناں دا نذرانہ پیش کیتے۔ انہاں کشمیری بھراویں تے بھیݨیں کوں اخلاقی، سیاسی اتے سفارتی مدد دی مکمل یقین دہانی کرائی۔ شہدا کوں خراجِ عقیدت پیش کرݨ کیتے ائیر چیف یادگار شہدا تے پھلاں دی چادر چڑھائی اتے فاتحہ خوانی کیتی۔ تقریب اچ پرنسپل اسٹاف آفیسرز، افسران، ائیر مین اتے سویلینز دی وݙی تعداد شرکت کیتی ، ایندے توں پہلے تاریخی ݙینھ دی مناسبت نال کراچی اچ پائلٹ آفیسر راشد منہاس شہید (نشانِ حیدر) دی قبر تےائیر وائس مارشل زعیم افضل، ائیر آفیسر کمانڈنگ، سدرن ائیر کمانڈ سربراہ پاک فضائیہ دی طرفوں پھلاں دی چادر چڑھائی تے فاتحہ پڑھی پورے ملک اچ پاک فضائیہ دے ٻئے شہداء دیاں قبراں تے وی ایں طرح دی تقریب منعقد کیتیاں ڳئن۔
